2Ch 31 | NdeIBE | STEP | Sekuphelile konke lokhu abako-Israyeli ababesemkhosini bangena emizini yakoJuda, badiliza izinsika zokukhonzela u-Ashera. Badiliza izindawo zokukhonzela lamaalithare kulo lonke elakoJuda lakoBhenjamini kanye lako-Efrayimi lakoManase. Bathe sebekudilizile konke lokhu, abako-Israyeli babuyela emizini yabo, ezindaweni zabo.

2 Chronicles 31

1 Sekuphelile konke lokhu abako-Israyeli ababesemkhosini bangena emizini yakoJuda, badiliza izinsika zokukhonzela u-Ashera. Badiliza izindawo zokukhonzela lamaalithare kulo lonke elakoJuda lakoBhenjamini kanye lako-Efrayimi lakoManase. Bathe sebekudilizile konke lokhu, abako-Israyeli babuyela emizini yabo, ezindaweni zabo.

Iminikelo Yenkonzo

2 UHezekhiya wamisa abaphristi labaLevi ngezigaba ngamunye wabo kusiya ngemisebenzi yabo yobuphristi kumbe eyabaLevi eyokunikela ngeminikelo yokutshiswa leminikelo yobudlelwano, ukukhonza, ukubonga kanye lokuhlabelela indumiso emasangweni endaweni ehlala uJehova. 3 Inkosi yapha okuvela kweyayo inotho iminikelo yokutshiswa yekuseni lantambama kanye lokweminikelo yokutshiswa ngamaSabatha, leyokuThwasa kweziNyanga yamisa njalo lezinsuku zamadili lawo njengokulotshiweyo eMthethweni kaJehova.

4 Inkosi yathi abantu abahlala eJerusalema kumele banike abaphristi labaLevi imfanelo yabo ukuze basebenze ngokuzinikela eMthethweni kaJehova.

5 Masinyazana ngemva kwesiqondiso, abako-Israyeli banikela kakhulu ngokwesivuno sakuqala samabele, lokwewayini elitsha, lokwamafutha lokwenyosi lakho konke okwakutholakala emasimini. Baletha okunengi kakhulu, okwetshumi kukho konke. 6 Amadoda ako-Israyeli lawakoJuda ayehlala emizini yakoJuda lawo aletha okwetshumi kwemihlambi yezinkomo leyezimvu zawo lezinto ezingcwele zokunikela kuJehova uNkulunkulu wawo, azibuthelela inqwabanqwaba. 7 Baqalisa ukukwenza lokhu ngenyanga yesithathu baze baqeda ngenyanga yesikhombisa. 8 UHezekhiya lezikhulu zakhe befika bebona lezozinqwabanqwaba badumisa uJehova njalo babusisa abantu bakhe bako-Israyeli.

9 UHezekhiya wabuza abaphristi labaLevi ngenqwabanqwaba; 10 u-Azariya umphristi omkhulu, owendlu kaZadoki wamphendula wathi, “Kusukela abantu beqalise ukuletha iminikelo yabo ethempelini likaJehova, sesizuze ukudla okunengi njalo okusalayo kunengi kakhulu, ngoba uJehova ubabusisile abantu bakhe, yikho kulalokhu okunengi kangaka okuseleyo.”

11 UHezekhiya wapha imilayo yokuba kwakhiwe iziphala ethempelini likaJehova, lakanye lokho kwenziwa. 12 Ngakho baqhubeka beletha izipho ngokwethembeka, lokwetshumi kanye lezipho eziqakathekileyo. UKhonaniya, umLevi, wayephethe lezizinto, njalo umfowabo uShimeyi wayengumsekeli wakhe. 13 UJehiyeli, lo-Azaziya, loNahathi, lo-Asaheli, loJerimothi, loJozabhadi, lo-Eliyeli, lo-Isimakhiya loMahathi kanye loBhenayiya babekhangele umsebenzi bengaphansi kukaKhonaniya lomfowabo uShimeyi, njengokukhethwa kwabo yinkosi uHezekhiya lo-Azariyathi isikhulu esasikhangele ithempeli likaNkulunkulu.

14 UKhore indodana ka-Imna umLevi, owayengumlindi weSango langeMpumalanga, wayephethe iminikelo yokuzithandela kuNkulunkulu, enguye owaba okunikelwe kuJehova kanye lezipho ezahlukaniselweyo.

15 U-Edeni, loMiniyamini, loJeshuwa, loShemayiya, lo-Amariya kanye loShekhaniya bamncedisa kakhulu emizini yabaphristi, besabelana kusiya ngezigaba zabaphristi, abadala labatsha, ngokufananayo.

16 Phezu kwalokho, babesabela abesilisa kusukela kwabaleminyaka emithathu ngokulotshwa egwalweni lokuzalana kwabo bonke ababezangena ethempelini likaJehova besiyakwenza imisebenzi etshiyeneyo kusiya ngemilandu yabo ngezigaba zabo. 17 Babela abaphristi ngezimuli zabo njengokulotshiweyo egwalweni lokuzalana kwabo njalo kwaba njalo lakubaLevi abaleminyaka engamatshumi amabili yokuzalwa labadala, kusiya ngemisebenzi yabo langezigaba zabo. 18 Lokhu kwakuhlanganisa abantwana, abesifazane kanye lamadodana lamadodakazi esigaba sonke kwabasegwalweni lokuzalana kwabo. Ngoba babethembekile ngokuzahlukanisela kwabo.

19 Abaphristi abayinzalo ka-Aroni, ababehlala eziqintini eduzane lamadolobho loba kwamanye amadolobho, babeqanjwe ngamabizo ukuthi babelane iziqa baze babele lalabo bonke ababelotshiwe ezingwalweni zokuzalana kwabaLevi.

20 Lokhu yikho okwenziwa nguHezekhiya kulo lonke elakoJuda, esenza okufaneleyo lokulungileyo ngokwethemba kuJehova uNkulunkulu wakhe. 21 Kukho konke ayekwenza emsebenzini wethempeli likaNkulunkulu lasekulaleleni kwakhe umthetho lemilayo, wadinga uNkulunkulu njalo wasebenza ngenhliziyo yakhe yonke. Ngalokho waphumelela.